Харшлаас урьдчилан сэргийлэх нь хамгийн чухал

Харшил гэдэг нь хүний дархлааны системийн тэнцвэр алдагдаж, гадны нөлөөнд хэт мэдрэг болж, тухайн үйл явц нь арьс болон бие мах бодод сөргөөр илрэх шинж юм. Үүнийг дэлхий нийтээр иргэншил, нийгэмшлийн өвчин гэж нэрлэдэг. Энэ өвчин манай оронд улам ихсэх төлөвтэй байгааг мэргэжилтнүүд онцолдог. Учир нь манай орон хуурай уур амьсгалтай, мөн тоосжилт, хөрсний бохирдлын хэмжээ тун өндөр байгаа нь харшлын төрөл олшрох гол шалтгаан болоод байгаа юм. Тэгвэл энэ удаагийн мэдээллээр танд харшилын шинж тэмдэг илэрсэн үед авах арга хэмжээний талаар мөн харшлаас урьдчилан сэргийлэх зөвлөмжийг хүргэж байна. 

Мэргэжлийн эмчээс зөвлөгөө аваарай

Хүмүүсийн дунд дархлаа сулрахаар харшилтай болдог гэсэн буруу ойлголт байдаг. Үүнээс үүдэн мэргэжлийн эмчийн зөвөлгөөгүйгээр дархлаа дэмжих эмийг иргэд замбараагүй хэрэглэх болсон нь эргээд дархлааны системийн хэвийн үйл ажиллагааг алдагдуулахад хүргэдэг аж. Тиймээс танд найтаах, бие загатнах, нулимс гарах зэрэг харшлын шинж тэмдэг илэрвэл юуны түрүүнд мэргэжлийн эмчид хандаж юунаас харшилтай гэдгээ тодорхойлуулаарай.  

Тогтмол агаараа цэвэршүүлээрэй

Нийслэлийн эрүүл мэндийн байгууллагаас улаанбаатар хотын нийт иргэдийн 4 хүн тутмын 1 нь харшилтай гэсэн тоон судалгааг гаргасан байна. Ялангуяа ихэнх нь тоос тоосонцорын, ургамлын харшилтай байгаа нь судалгаагаар тогтоогджээ. Мэргэжлийн эмч нарын зүгээс хавар, зуны улиралд гэртээ өдөр бүр тогтмол чийгтэй цэвэрлэгээ хийхийг зөвлөж байна. Ингэснээр тоосны харшлаас урьдчилан сэргийлэх бүрэн боломжтой юм. Мөн түүнчлэн та бага насны хүүхэдтэй бол гэртээ агаар цэвэршүүлэгч авч тавихыг таньд зөвлөж байна. Учир нь бага насны хүүхдийн дархлааны систем 6 нас хүртлээ бүрэн тогтдоггүй учраас элдэв мөөгөнцөр зэрэг агаараар дамжих нян бактериас харшилтай болох магадлал өндөр байдаг аж. Тиймээс та гэрийнхээ агаарыг тогтмол цэвэршүүлж чийглэг байлгаарай. Хэрэв танайх агаар цэвэршүүлэгчийг тогтмол хэрэглэдэг бол  шүүлтүүрийг нь сольж хэвших хэрэгтэй шүү.