Гэртээ "аз жаргалын шил"-тэй болоорой

Хүүхдийг хүмүүжүүлэх эерэг аргуудаас таньд хүргэж байна. Гэр бүлийн эерэг дулаахан уур амьсгал гэдэг хүүхдийн хүмүүжлийн хувьд асар чухал нөлөөтэй. Тиймээс та гэр бүлийнхээ харилцааг эерэг уур амьсгалтай байлгаж, хүүхэдтэйгээ илэн далангүй харилцаж, түүний дотны найз байгаарай. 

• Тэднийг найз мэт чин сэтгэлээсээ сонс. Тэднийг хүссэн цагт нь сонсоорой. Тэд танд улам итгэж нээлттэй байх болно.
• Тэдний үзэл бодол, яриаг шүүмжлэх гэж бүү яар.
• Та бүхэн тэдэнтэй харилцахдаа дуу хоолойны өнгө, нүүрний хувирал, нүдний харцаа харилцах явцдаа хэрхэн эерэг зөөлөн байлгах тал дээр анхаараарай.
• Түүний гаргасан амжилтыг бага гэлтгүй анзаарч түүнийг нь бодитоор урамшуулаарай.
• Тэдэнд цаг гарга. Орой нь тухайн өдөр нь хэрхэн өнгөрсөн, ямархуу байсан, шинэ гайхалтай явдлууд болсон талаар нь ярилцаж байгаарай.
• Оройн хоолны ширээгээ гэр бүлээрээ тойроод идэх нь харилцааны эерэг уур амьсгалыг бий болгодог.
• Хүүхдээ бусадтай харьцуулах хэрэггүй. Байгаагаар нь хүлээж ав. Харин өөрчлөх зүйл дээр нь хамт байж дэмжээрэй.
• Тэднийг байнга дэмжиж харилцах нь өөртэй итгэлтэй болгохоос гадна өөрийнхөө мэдрэмжийг таньж, бусдад мэдрэмжээ зөв илэрхийлж сурдаг.
• Та гэртээ аз жаргалын “шил”-тэй болоорой. Энэхүү шилэндээ гэрт тохиолдсон сайн сайхан, баярт үйл явдалыг бичиж шинэ жилээр бөөнөөрөө задалж уншаарай.
• Та хүүхэдтэйгээ харилцахад хүндрэлтэй байвал түүнд чин сэтгэлийн захиа бичээрэй. Энэ нь таны бодож байгаагаас илүү том амжилтыг авчрах болно.

Сэтгэл зүйч, Сэтгэл засалч  Х.Хандсүрэн