“Говь” брэнд 2016 оны хавар, зуны загварын шоугаа толилууллаа

“Говь” брэнд 2016 оны хавар, зуны цоо шинэ коллекциос бүрдэх загварын шоугаа энэ сарын 5-ны өдөр зохион байгууллаа. Шинэ цуглуулгад 1970-аад оны бохо, богем стиль, романтик, минимал, хипстер, ажил хэрэгч төрхүүд багтсан байна.

Тус брэндийн чадварлаг дизайнерууд Simplicity, Color Bomb, Bohemian Love гэсэн сэдэвтэй өөр өөрийн онцлог шийдэл бүхий загваруудаараа 2016 оны хувцас загварын өнгө төрхийг  тодорхойлж байна.

“COLOR BOMB”  КОЛЛЕКЦИ

Илүү хөнгөн, спортлог хэрнээ тансаг загварын цуглуулга. Дээд зэргийн ноолуур,   торго, гэрэлтдэг материал, 3D чимэглэл зэргийг хослуулсан эдгээр загварууд нь  зуны чихэрлэг зөөлөн өнгөөрөө та бидний сэтгэлийг сэргээж байна. Монголд зун оройдоо ихэвчлэн сэрүүн байдаг тул эдгээр загварууд бүсгүйчүүдийг зөөлөн илчээр тэвэрч, өдрийн цагаар сэрүүцүүлэх чадвартай болжээ.  

“BOHEMIAN LOVE” КОЛЛЕКЦИ 

Загварын чиг хандлага хувьсан өөрчлөгддөг хэдий ч хуучны гайхалтай загварууд эргэн ирдэг. 1970-аад оны боохоо орчин үеийн чиг хандлага болон та бүхэнд хүрч байна. 

“SIMPLICITY” КОЛЛЕКЦИ   

Simplicity коллекци нь сонгодог хэв маягаар хувцаслах дуртай хэрэглэгчдэд зориулагдсан бөгөөд тансаг ноолуурыг 3D чимэглэл , торго илэгтэй хослуулсан эдгээр загварууд нь илүү эрхэмсэг тансаг загварууд юм.

Энэ удаагийн загварын шоуны өөр нэг онцлог зүйл нь текстиль дизайнер Ч.Сэндэм “Говь” брэндтэй хамтран гаргаж буй цоо шинэ коллекцио танилцуулж буй явдал юм. 

Мөн энэ удаагийн  загварын шоуны хараа булаам шинэ загваруудын нэг нь хоёр талаар өмсдөг цоо шинэ технологийн тансаг ноолууран  пальто байлаа.

“SENDEM” КОЛЛЕКЦИ

Sendem цуглуулгыг танилцуулахдаа дизайнер Ч.Сэндэм "Ноолуурыг урлагтай хослуулж, хэрэглээг урлаг болгох зорилготой" гэж хэллээ. Хорин жил торгон зургийн чиглэлээр ажилласан түүний цуглуулгад Мадам Мари, Соно, Цагаан уул, Говь гэсэн хэсгүүд оржээ. Эдгээр загваруудын бүтээлч урмаа дизайнер 2015 онд Парист, Гэгээн Клодын шилтгээнд болсон Монголын соёлыг танилцуулах үзэсгэлэнд оролцохдоо авсан гэнэ. Тиймээс өөрийг нь урамшуулсан Мадам Маригийн нэрээр зарим загвараа нэрлэсэн байна. Мөн Соно, Говь, зэрэг загварууд нь түүний бага насны дурсамж, байгальд хайртай сэтгэлийнх нь илрэл гэлээ. 

Харахад л нүд булаам  зөөлөн өнгө, гэрэлтсэн материал бүхий зуны ноолуур урин цагийг илтгэж байсан. Ийнхүү Говь брэнд өнгөлөг, өөдрөг уур амьсгалтай цуглуулгаараа Монголд урин цагийн салхийг хагалж, шинэ загваруудаа амжилттай танилцууллаа.