Дархан-Уул аймаг элсэлтийн шалгалтад (ЭШ) өндөр амжилт үзүүлсэн сурагчид болон тэднийг бэлтгэсэн багш нартаа хүндэтгэл үзүүлж, мөнгөн урамшуулал гардууллаа. Энэхүү арга хэмжээний үеэр ЭШ-д хоёр болон түүнээс дээш хичээлээр 700-аас дээш оноо авсан 73 сурагчид батламж гардуулж, амжилтыг нь үнэлэн 500 мянгаас 12 сая хүртэлх төгрөгийн мөнгөн шагналаар урамшуулсан байна.

Мөн шавь нар нь амжилттай шалгуулахад голлох үүрэг гүйцэтгэсэн багш нарыг орхигдуулсангүй. Элсэлтийн шалгалтад 5 болон түүнээс дээш сурагч нь үнэмлэхүй амжилт гаргасан 11 багшид 1-2 сая төгрөгийн мөнгөн шагнал олгожээ.

Шалгалтын статистик үзүүлэлт:

• Нийт төгсөгчид: 1,746 сурагч

• ЭШ өгсөн сурагчид: 1,179 сурагч

• Үнэмлэхүй амжилт (800 оноо): 8 сурагч шалгалтаараа дээд оноо авсан.

• Олон улсын шалгалтын дүйцүүлэлт: Давхардсан тоогоор 65 сурагч олон улсын шалгалтын оноогоороо 800 онооны болзол хангасан байна.