Монгол Улс, Бүгд Найрамдах Социалист Вьетнам Улс (БНСВУ)-ын хууль сахиулах салбарын хамтын ажиллагааны түүхэнд нэгэн шинэ хуудас нээгдэж, Вьетнам улсын Морьт цагдаагийн албанд нэр төртэйгөөр үүрэг гүйцэтгэсэн 20 монгол адуу 2026 оны 7 дугаар сарын 6-ны өдөр тусгай үүргийн онгоцоор эх орондоо газардлаа.

Түүхэн шийдвэр ба “Дэлхийн адууны өдөр”

Энэхүү үйл явдал нь Монгол Улсын Ерөнхийлөгчийн 2025 оны 12 дугаар сарын 16-ны өдрийн 26 дугаар захирамжтай шууд холбоотой юм. Уг захирамжаар нүүдэлчин ахуй, ёс заншлыг хадгалан хамгаалах, адууны өв соёлыг түгээн дэлгэрүүлэх, сурталчлан таниулах зорилгоор “Дэлхийн адууны өдөр”-ийг улсын хэмжээнд тэмдэглэн өнгөрүүлэх түүхэн шийдвэр гарсан билээ.

Үүнтэй холбогдуулан Монголын талаас Вьетнам улсад санал тавьсны дагуу, тус улсын төр засаг олон жил зүтгэсэн хүлгүүдийг Монгол Улсад буцаан бэлэглэх шийдвэрийг гаргажээ.

Хамтын ажиллагааны үр дүн ба ложистик

Түүхэн чухал шийдвэрийг хэрэгжүүлэхээр Хууль зүй, дотоод хэргийн Дэд сайд Д.Мөнх-Эрдэнээр ахлуулсан салбар дундын Ажлын хэсэг (ЦЕГ, ХХЕГ, ШШГЕГ, ГЕГ, ИНЕГ зэрэг) шуурхай байгуулагдан ажиллажээ. Тэд мал эмнэлэг, хорио цээрийн шинжилгээ, вакцинжуулалтаас эхлээд экспорт, импортын зөвшөөрөл, баримт бичгийн бүрдүүлэлтийг үе шаттайгаар бүрэн хангасан байна.

Түүнчлэн, адууг агаарын хөлгөөр тээвэрлэх нарийн төвөгтэй ложистикийг:

• Монголын талаас: “Өндөр Зотол Ложистик” ХХК

• Вьетнамын талаас: “Golden Sun Logistics Services Co., Ltd” компаниуд амжилттай хариуцан зохион байгуулжээ.

Эх орон, ард түмнийхээ хүндэтгэл, бахархал болсон хүлгүүдээ хүлээн авах хүндэтгэлийн үйл ажиллагаанд албаны олон хүмүүс оролцлоо. Тухайлбал:

• Монгол Улсын Ерөнхийлөгчийн Тамгын газрын дарга А.Үйлстөгөлдөр,

• Хууль зүй, дотоод хэргийн дэд сайд Д.Мөнх-Эрдэнэ,

• Шүүхийн шийдвэр гүйцэтгэх ерөнхий газрын дарга, хурандаа А.Намсаманд,

• БНСВУ-ын НАБЯ-ны Хөдөлгөөнт цагдаагийн дэд командлагч, хурандаа До Диен Туй (Ажлын хэсгийн ахлагч),

• БНСВУ-аас Монгол Улсад суугаа Элчин сайдын яамны 1 дүгээр нарийн бичгийн дарга Нгуен Ту Нгиа Дук нар оролцов.

Ирсэн 20 адууны цаашдын арчилгаа, маллагаа, хамгаалалтыг Шүүхийн шийдвэр гүйцэтгэх ерөнхий газрын (ШШГЕГ) алба хаагчид тусгайлан хариуцаж ажиллахаар болсон байна.

Зургаан жилийн өмнөх түүх сөхөхөд

Анх 2019 оны 7 дугаар сард БНСВУ-ын Нийгмийн аюулгүй байдлын сайд То Лам Монгол Улсад айлчлах үеэрээ тус улсад Морьт цагдаагийн алба үүсгэн байгуулахад дэмжлэг үзүүлэх хүсэлт гаргаж байжээ. Үүний дагуу манай улсын ХЗДХЯ болон холбогдох байгууллагууд ажиллаж, 2020 оны 1 дүгээр сард анхны монгол адууг Вьетнам Улсад тусгай үүргийн нислэгээр хүргэж байсан түүхтэй.

Өнгөрсөн хугацаанд Вьетнамын тал адууг арчлан хамгаалах, сургах ажлыг өндөр түвшинд зохион байгуулж, 2023-2024 онуудад хоёр улс харилцан төлөөлөгчдөө илгээн, мэргэжлийн сургалт, туршлагаа тогтмол солилцож ирсэн юм.

Адуугаа эх оронд нь авчрах ажлыг газар дээр нь зохион байгуулахаар Вьетнам улсын Нийгмийн аюулгүй байдлын яамны Ажлын хэсэг 2026 оны 7 дугаар сарын 4-нөөс 7-ны өдрүүдэд Монгол Улсад албан ёсоор ажиллалаа.