Засгийн газраас өргөн мэдүүлсэн Шударга тэтгэврийн тогтолцооны хууль УИХ-ын гишүүдийн 85.9 хувийн өндөр дэмжлэгтэйгээр батлагдлаа. Энэхүү хуулийн шинэчлэл нь иргэдийн ирээдүйн баталгааг хангах, хөдөлмөр эрхлэлтийг дэмжихэд чиглэсэн түүхэн шийдвэр болж байна. Шинэ хуулийн хамгийн онцлох заалтуудыг багцлан хүргэе.

1. Ахмадуудад суурь тэтгэвэр шинээр олгоно

Ирэх жилүүдэд ахмад настнуудын орлогыг дэмжих томоохон алхам хийгдэнэ. 2027 оны 1-р сарын 1-нээс эхлэн нийт 435 мянган ахмад настанд 100,000-аас 300,000 төгрөгийн суурь тэтгэврийг шинээр олгохоор боллоо.

2. Тэтгэвэр бодох хугацаа 10 жил болно

Тэтгэврийн сангийн тогтвортой байдлыг хангах үүднээс 2033 оноос эхлэн 10 жилийн цалингийн дунджаас тэтгэврийг бодож тогтоодог болох юм. Ингэхдээ нэрийн дансны даатгуулагчийн тэтгэврийн хэмжээг огцом бууруулахгүй байх зохицуулалтыг хуульд тусгажээ.

3. Тэтгэвэр тогтоолгох нас ба 4%-ийн урамшуулал

Иргэдийг илүү олон жил ажиллаж, нийгмийн даатгал төлөхийг дэмжих урамшууллын тогтолцоо орж ирлээ.

• Илүү ажиллавал: Тэтгэвэр тогтоолгох наснаас хойш үргэлжлүүлэн ажиллавал ажилласан жил тутамд сарын тэтгэврийг 4 хувиар нэмэгдүүлнэ.

• Өмнө нь гарвал: Хэрэв хуулиар тогтоосон наснаас өмнө тэтгэвэрт гарвал жил тутамд тэтгэвэр 4 хувиар буурна.

💡 Жишээ нь: Хэрэв та тэтгэвэрт гарах наснаасаа хойш 3 жил илүү ажиллавал таны сарын тэтгэвэр 12 хувиар нэмэгдэж тогтоогдоно гэсэн үг юм.

4. Хувийн тэтгэврийн сан ба Давхар тэтгэвэр

Зөвхөн улсын тэтгэвэрт найдах шаардлагагүй боллоо. Иргэд сайн дураар шимтгэлээ хувийн тэтгэврийн сангуудад төлж, ирээдүйд нэмэлт тэтгэвэр авах эрх зүйн нөхцөл бүрэн бүрдэв.

5. Оюутан залуус, жижиг бизнес эрхлэгчдийг дэмжих заалтууд

Хөдөлмөрийн зах зээлийг идэвхжүүлэх, ажлын байрыг хадгалах зорилгоор Нийгмийн даатгалын шимтгэл (НДШ)-ээс чөлөөлөх, хөнгөлөх хэд хэдэн чухал заалт оржээ.

Тэтгэврийн шинэ тогтолцоо нь иргэн бүр залуу, хөдөлмөрлөж чадах насандаа нийгмийн даатгалаа идэвхтэй төлж, ирээдүйдээ хөрөнгө оруулалт хийх "шударга" зарчмыг баримталж байна. Өөрөөр хэлбэл, та хэдий чинээ олон жил даатгал төлнө, төдий чинээ өндөр тэтгэвэр авч, амгалан өтлөх нөхцөл бүрдэж байна.