Монгол улсад бүртгэгдэж буй гэмт хэргийн бүтэц сүүлийн жилүүдэд эрчимтэй өөрчлөгдөж, залилан мэхлэх гэмт хэрэг нийгмийн аюулгүй байдалд томоохон заналхийлэл учруулж байна. 2025 оны статистик мэдээллээс харахад цагдаагийн байгууллагад бүртгэгдсэн нийт 47,480 гэмт хэргийн гуравны нэг буюу 16,906 нь залилах төрлийн хэрэг байгаа юм.

1. Цахим орчин: Залилагчдын гол "талбар"

Манай улсын нийт хүн амын 73 хувь буюу 2.6 сая иргэн Фэйсбүүк идэвхтэй хэрэглэж байгаа нь залилагчдад олзоо хайх таатай нөхцөлийг бүрдүүлж байна. Үүний улмаас цахим залилан сүүлийн 3 жилд 34.3 хувиар өсжээ.

Залилах гэмт хэрэг: 

• Байршлаар: Нийт хэргийн 82.7% нь нийслэл хотод, 17.3% нь орон нутагт бүртгэгдсэн.

• Үйлдэх аргаар: Нийт залилангийн 72.3% нь цахим орчинд үйлдэгдэж байна.

2. Та юунаас болгоомжлох ёстой вэ? 

Цахим орчинд үйлдэгдэж буй залиланг нарийвчлан үзвэл иргэд дараах хэлбэрээр хамгийн их хохирч байна:

• 42.2%: Онлайн бараа, үйлчилгээ захиалга (Мөнгөө шилжүүлээд бараагаа аваагүй).

• 11.3%: Телеграмм даалгавар биелүүлэх (Өндөр ашиг амласан сүлжээ).

• 9.1%: Хуурамч хандив

• 8.1%: Халамж, тэтгэмж олгох нэрээр

• 6.0%: Найз нөхдийн фэйсбүүк хаягийг хакердан мөнгө зээлэх

• Бусад: Хуурамч бичиг баримт, виз, хөрөнгө оруулалт, үл хөдлөх хөрөнгийн залилан.

3. Банкны данс: Гэмт хэргийн "дамжлага"

Өнгөрсөн онд үйлдэгдсэн залилангийн хэргийн 89.2 хувь нь арилжааны 9 банкны нийт 30,162 дансыг ашиглан дамжуулагдсан байна. Энэ нь залилагчид бусдын дансыг ашиглах, түрээслэх замаар мөнгө угаах үйлдэл өндөр байгааг харуулж байна. Тиймээс өөрийн дансаа бусдад ашиглуулахгүй байхыг Цагдаагийн байгууллагаас онцгойлон анхааруулж байна.

4. Цагдаагийн байгууллагын тэмцэл ба Үр дүн

Цагдаагийн ерөнхий газраас гэмт хэргийн илрүүлэлтийг өмнөх оноос 1.2 хувиар өсгөж, нийт учирсан хохирлын 40.5 хувийг нөхөн төлүүлээд байна. 

   ЭХ СУРВАЛЖ: ЦЕГ-ын УСА