Энэ өдөр УИХ-ын дарга, Монгол Ардын намын дарга Н.Учрал, УИХ-ын гишүүн, ЗГХЭГ-ын дарга С.Бямбацогт, УИХ дахь МАН-ын бүлгийн дарга Ж.Батжаргал, УИХ-ын гишүүн Ж.Галбадрах, Д.Рэгдэл тэргүүтэй намын газар, хэлтсийн дарга, ажилтнууд, ахмадууд, залуучууд, иргэдийн төлөөлөл Ж.Батмөнхийн дурсгалын хөшөөнд цэцэг өргөн хүндэтгэл үзүүлэв. Хүндэтгэл илэрхийлэх ёслолын гол зочид нь Жамбын Батмөнх агсны зээ дүү Д.Энхбаатар, Т.Оюун болон гэр бүлийн төлөөлөл 10 гаруй хүн байлаа.

Өдгөөгөөс яг 36 жилийн өмнө 1990 онд нэгэн түүхэн шийдвэр гарснаар Монгол Улс ардчилсан нийгэм рүү тайван замаар шилжих эхлэл тавигдсан юм. Ардын Их Хурлын Тэргүүлэгчдийн дарга Жамбын Батмөнх агсан "хүч хэрэглэж хэрхэвч болохгүй" хэмээх алдарт үгээ хэлж, Улс төрийн товчоогоо огцруулах шийдвэр гаргаснаар өнөөдрийн бидний эрх чөлөөт нийгэм бүрэлдэн тогтжээ. Монгол Ардын Нам улс орны тусгаар тогтнол, эрх чөлөө, эв нэгдэл, ардчиллыг бэхжүүлэх үйлсэд үнэтэй хувь нэмэр оруулсан хүндтэй хүмүүсийн түүхэн гавьяаг дурсан санаж, мэндэлсэн ойг нь тэмдэглэн өнгөрүүлдэг уламжлалтай билээ.