Улаанбаатар хотын авто замын түгжрэлийг бууруулах томоохон шийдэл болгон яригдаж буй "Туулын хурдны зам"-ын төслийн тооцоолол, үр ашгийн талаар УИХ-ын гишүүн П.Наранбаяр шүүмжлэлтэй байр суурь илэрхийллээ.

Гурван хэтэвч дамжих мега төсөл

Нийслэлийн түгжрэлийг цогцоор нь шийдэхийн тулд Туулын хурдны замаас гадна хотыг тойрсон нийт битүү тойрог замыг барихаар төлөвлөж байгаа бөгөөд үүнд нийтдээ 8-9 их наяд төгрөгийн хөрөнгө оруулалт шаардлагатай гэсэн тооцоо гарчээ. Хэрэв энэхүү мега төсөл бүрэн хэрэгжвэл хотын түгжрэл 30-35 хувиар, харин зөвхөн Туулын хурдны замыг барихад 13-15 хувиар буурна гэж үзэж байгаа юм.

Тооцооллын алдаа юу, эсвэл хэт өөдрөг төсөөлөл үү?

П.Наранбаяр эдгээр тооцооллыг "дэгсдүүлсэн байх магадлалтай" хэмээн үзэж, дараах гурван үндэслэлээр тайлбарлаж байна:

• Цаг уурын нөхцөл байдал: Хурдны замаар явах машины хурдыг жилийн дөрвөн улиралд 100 км/цаг байна гэж тооцсон нь өвлийн халтиргаа гулгаатай үеийн эрсдэлийг орхигдуулсан байна.

• Автомашины техникийн үзүүлэлт: Монгол Улсын замын хөдөлгөөнд оролцож буй буруу хүрдтэй автомашинууд нь хөдөлгөөний эрчмийг сааруулж, түгжрэлийг 10 орчим хувиар нэмэгдүүлдэг хүчин зүйлийг тооцоондоо тусгаагүй.

• "Лонхны хүзүү" буюу замын зангилаа: Хурдны замаас хотын төв рүү орох, гарах долоон цэг байхаар төлөвлөсөн байна. Судалгаагаар хотын төв рүү чиглэсэн урсгал үргэлж 12 хувиар илүү байдаг тул эдгээр долоон цэгт бөглөрөл үүсэж, хурдны замын үр ашгийг бууруулах эрсдэлтэй аж.

Зам баригдсанаар хөдөлгөөний урсгал сайжирч, түгжрэл тодорхой хэмжээнд буурах нь тодорхой ч бодит нөхцөл байдлыг (өвлийн улирал, автомашины хүрд, замын уулзвар) нарийн тооцохгүй бол асар их төсвөөр баригдсан зам хүлээгдэж буй 15 хувийн үр дүнд хүрэхгүй байж магадгүйг тэрээр анхаарууллаа.