Засгийн газрын 2026 оны 4 дүгээр сарын 8-ны өдрийн хуралдаанаар төрийн байгууллагын бүтцийг оновчлох, албан хаагчдын бүтээмжийг нэмэгдүүлэх чиглэлд томоохон шийдвэрүүд гаргалаа. Засгийн газрын хяналт хэрэгжүүлэх газрын дарга Б.Батцэцэг энэхүү "Чөлөөлөх аян"-ы хүрээнд хэрэгжих гол зохицуулалтуудыг танилцууллаа.

1. Ажлын цагийн уян хатан зохицуулалт ба Зайнаас ажиллах боломж

Төрийн албан хаагчдын ажлын ачааллыг оновчлох зорилгоор ажлын цагийн менежментэд дараах шинэчлэлүүдийг хийв:

• Уян хатан цаг: Байгууллагууд дотоод журмаараа 07:00–08:30 цагийн хооронд ажил эхлэх, 16:00–17:30 цагийн хооронд ажил тарах зохицуулалтыг хийх боломжтой боллоо.

• Зайнаас ажиллах: Төрийн албаны хуульд заасны дагуу төрийн албан хаагчдыг долоо хоногийн нэг өдөр цахимаар буюу зайнаас ажиллах боломжийг Засгийн газраас дэмжиж, хэрэгжүүлэхээр шийдвэрлэлээ.

• Орон нутгийн зохицуулалт: Нийслэлийн боловсрол, үйлчилгээний байгууллагуудын цагийн хуваарьт өөрчлөлт оруулах эрхийг Хотын дарга Х.Нямбаатарт олгожээ.

2. Тайлан бичих "хиймэл" ачааллыг 80 хувь хүртэл бууруулна

Өнөөдрийг хүртэл төрийн албан хаагчид ажлын цагийнхаа 70–80 хувийг шат шатны байгууллага хооронд мэдээлэл солилцох, явцын тайлан боловсруулахад зарцуулж ирсэн байна. Үүнийг зогсоохын тулд:

• Засгийн газрын ашиглаж буй 93.3 тэрбум дата өгөгдөл бүхий "Их өгөгдлийн дашборд"-ыг нийт төрийн албан хаагчдад нээлттэй болгов.

• Ингэснээр албан хаагчид бие биенээсээ тоо мэдээлэл нэхэж, албан бичиг шидэлцэх шаардлагагүй болж, процедурын шинжтэй тайлагналтаас бүрэн чөлөөлөгдөж байна.

3. Процессыг бүрэн цахимжуулж, шалгалтыг зогсоов

• Бүрэн цахимжилт: Яамдаас Засгийн газрын хэрэг эрхлэх газар руу материал ирэх бүх үе шатыг (төрийн нууцаас бусад) бүрэн цахимжуулахыг холбогдох сайд нарт үүрэг болгов.

• Хяналт шалгалт: 2026 оны 4 дүгээр сарын 8-ны өдрөөс эхлэн төлөвлөгөөт болон урьдчилан сэргийлэх хяналт шалгалтын удирдамжийг батлахгүй бөгөөд ийм төрлийн шалгалтууд очихгүй болохыг албан ёсоор мэдэгдлээ.

Засгийн газрын энэхүү шийдвэр нь төрийн албыг "цаасны ажил"-аас салгаж, иргэдэд хүрэх үйлчилгээний чанарыг сайжруулахад чиглэсэн томоохон алхам болж байна.