Наадмын морьт харваанд бэлтгэгдэж байсан 18 морь хулгайлагдаж, СХД-ийн мал төхөөрөх газар хүргэгдэн, төхөөрөгдсөн ноцтой хэрэгт холбогдуулан 19-27 насны дөрвөн этгээдийг цагдаагийн байгууллагаас шалгаж байна.

Цагдаагийн Ерөнхий Газрын Хэвлэл мэдээллийн төвийн ахлах мэргэжилтэн, хошууч С.Баярбилэг энэ талаар мэдээлэхдээ:

“2025 оны 6 дугаар сарын 7-ны өдрийн 19:30 цагийн орчимд Хан-Уул дүүргийн 14-р хорооны нутаг дэвсгэрээс наадамд зориулан бэлтгэж байсан, 5-12 насны 18 морь алга болсон тухай дуудлага цагдаагийн байгууллагад ирсэн. Мөрдөн шалгах ажиллагааны үр дүнд морьд СХД-ийн мал төхөөрөх газар хүргэгдэн, төхөөрөгдсөн болох нь тогтоогдсон бөгөөд 19-27 насны дөрвөн этгээдийг уг хэрэгт холбогдуулан шалгаж байна” гэж мэдэгдлээ.

Хэрэгт холбогдуулан Монгол Улсын Эрүүгийн хуулийн холбогдох заалтаар “Мал хулгайлах” гэмт хэргийг бүлэглэн үйлдэж, их хэмжээний хохирол учруулсан тохиолдолд 5-12 жилийн хорих ял оногдуулах үндэслэлтэй байна.
ЦЕГ-аас энэ төрлийн гэмт хэрэгт хуулийн хатуу хариуцлага тооцохоо анхааруулж байна.